இந்திய கத்தோலிக்க ஆயர் மாநாட்டின் (CCBI) புலம்பெயர்ந்தோர் குழுவும், தமிழ்நாடு ஆயர் பேரவையின் (TNBC) புலம்பெயர்ந்தோர் குழுவும் இணைந்து திருச்சியில் ஒருநாள் பயிற்சி பட்டறை நிகழ்ச்சியை நடத்தின. இந்நிகழ்வு, குடியேற்ற மக்களின் உரிமைகள் மற்றும் மரியாதைக்காக திருச்சபை கொண்டுள்ள அர்ப்பணிப்பை வலியுறுத்தியது.
இந்நிகழ்வைத் தொடக்கி வைத்து, திருச்சி மறைமாவட்ட ஆயர் எஸ். ஆரோக்கியராஜ் அவர்கள், புலம்பெயர்ந்தோர் மக்கள் எதிர்கொள்ளும் பாடுகள் குறித்து ஆழ்ந்த சிந்தனையை முன்வைத்தார். “துன்புறுபவர்கள் அனைவரும் கடவுளால் ஆசீர்வதிக்கப்பட்டவர்களும், ஆதரவு பெற்றவர்களும் ஆவர்; எனவே திருச்சபைக்கும் புலம்பெயர்ந்தோர் மக்களுக்கான சிறப்பு அக்கறை உண்டு” என்று அவர் நினைவூட்டினார். மேலும் அவர், இம்மண்ணிலான வாழ்வு ஒரு பயணம் என்று வலியுறுத்தி, குடியேற வேண்டிய நிலைக்கு தள்ளப்படுவோரின் வாழ்க்கை நிஜங்களை கிறிஸ்தவர்கள் புரிந்துகொள்ள அழைத்தார்.
மேலும் “இயேசுவின் பிறப்பே மனிதகுலத்தின் சந்திப்பு” என்றும், அந்தப் பணி திருச்சபையால் தொடரப்பட வேண்டும் என்றும் அவர் குறிப்பிட்டார். அதே சமயம், வட இந்தியாவில் இருந்து அதிகமானோர் வருவதால் தமிழ்நாட்டில் புலம்பெயர்ந்தோர் தொடர்பான தனிப்பட்ட சவால்கள் உள்ளன என்றும், அவர்களில் பலர் வறியவர்கள், சிலர் அடிமைத்தொழிலில் சிக்கியவர்கள் என்றும் அவர் சுட்டிக்காட்டினார். பெரும்பாலான புலம்பெயர்ந்தோர் மக்கள் குறைந்தபட்ச கூலியும், மனிதாபிமானமான வாழ்வாதாரமும் இழக்கப்பட்டவர்களாக உள்ளனர் என்றும் அவர் வலியுறுத்தினார்.
CCBI புலம்பெயர்ந்தோர் குழுவின் நிர்வாகச் செயலாளர் அருட்பணி ஜெய்சன் வடசேரி அவர்கள் அமர்வுகளை நடத்தினார். புலம்பெயர்ந்தோர் மக்களுக்கான திருச்சபையின் மேய்ப்புப் பார்வையை அவர் விளக்கி, 111-வது புலம்பெயர்ந்தோர் மக்கள் மற்றும் அகதிகள் உலக தினத்திற்கான திருத்தந்தை லியோவின் செய்தியை அடிப்படையாகக் கொண்டு உரையாற்றினார். புலம்பெயர்ந்தோர் மக்களுக்கான ஆதரவு அமைப்புகளை வலுப்படுத்துவதற்காக குழுவினால் தயாரிக்கப்பட்ட மேய்ப்புத் திட்டத்தையும் அவர் அறிமுகப்படுத்தினார்.
TNBC புலம்பெயர்ந்தோர் குழுவின் செயலாளர் அருட்பணி டேவிட் ராஜேஷ் அவர்கள், தமிழ்நாட்டில் குடியேற்ற மக்களுக்கான பணியகம் திருச்சபையின் முக்கிய முன்னுரிமையாக உருவெடுத்து வருவதாகக் குறிப்பிட்டார். அதேசமயம், தலைமை மாற்றங்கள் அடிக்கடி நிகழ்வதால், இந்தப் பணியின் நிலையான வளர்ச்சிக்கு தடையாக இருக்கிறது என்றும் அவர் எச்சரித்தார்.
மேலும், வரும் தேசிய ஜூபிலி விழா தொடர்பான தயாரிப்புகள் குறித்தும் கூட்டத்தில் ஆர்வமுடன் பேசப்பட்டது. 2025 நவம்பர் 6 முதல் 8 வரை வேளாங்கன்னியில் நடைபெறவிருக்கும் இந்த விழாவிற்கான ஒருங்கிணைப்புக் குழு ஏற்கனவே அமைக்கப்பட்டுள்ளது. தமிழ்நாட்டின் ஒவ்வொரு மறைமாவட்டத்திலும் இருந்து குறைந்தது ஐந்து பிரதிநிதிகள் இந்த நிகழ்வில் பங்கேற்கவுள்ளனர்.
Daily Program
